Svefn í leikskólanum:

Í Lyngholti er hvíld fyrir öll börn frá kl. 11.30 til 13.00.Á þessum tíma óskum við eftir því að ekki sé verið að koma með börn eða sækja, þar sem hvíldartíminn okkar er mikilvægur.

Ef barnið sofnar í hvíldinni þá má það sofa þar til það vaknar sjálft, en gengið er út frá því að allir séu vaknaðir kl. 14, þegar boðið er upp á hressingu.

Ef barnið er enn sofandi um kl.13:45 þá byrjum við á því að kveikja ljós, tala í kringum barnið og vera í kringum það þannig að líkurnar á því að það vakni sjálft aukist.

Ef það tekur barnið meira en 20 til 30 mínútur að sofna hjá okkur í leikskólanum þá erum við ekki að sitja lengur með það inn í hvíld. Þá förum við í rólega stund meðan félagar okkar á deildinni sofa.

Æskilegur svefntími á mismunandi aldursskeiðum:

• Nýburar (0-3 mán): 14-17 klst.

• Ungbörn (4-11 mán): 12-15 klst.

• Smábörn (1-2 ára): 11-14 klst.

• Leikskólabörn (3-5 ára): 10-13 klst.

Daglúrar ungra leikskólabarna fyrir 14 á daginn ættu að öllu jöfnu ekki að gera þeim erfiðara fyrir að sofna á kvöldin, svo lengi sem þau þurfa að sofa á daginn og sofna fljótt í daglúrnum. Nokkurra mínútna orkublundur seinnipartinn getur hinsvegar frestað svefntíma um marga klukkutíma.

Áður en tekin er ákvörðun um að stytta daglúr eða sleppa honum er mikilvægt að skoða hvort barnið geti sofnað sjálft á kvöldin án vandræða og hvort svefnrútínan sé til þess fallin að auka líkur á að barnið sofni fljótt.

• Passað upp á að barnið fái nægjanlega hreyfingu yfir daginn.
• Tileinkað sér góðar svefnvenjur snemma (því fyrr því betra og auðveldara að fylgja eftir):
• Hefja rólega stund klukkutíma fyrir svefntíma (lesa, lita, spila, spjalla, hlusta á tónlist).
• Láta barn fara í bað/sturtu/sund í síðasta lagi klukkutíma fyrir svefntíma.
• Passa að barn borði ekki þunga máltíð minna en klukkutíma fyrir svefntíma.
• Enginn skjátími klukkutíma fyrir svefntíma.
• Snjallsímar og raftæki eru geymd utan svefnherbergis og enginn aðgangur að slíkum tækjum fyrr en barn fer á fætur á morgnana eða innan ákveðins tímaramma (t.d. milli 20.00 og 8.00).
• Passa að hitastig og birta sé hæfileg og sem minnst truflun til staðar

Byggt á efni frá Betri svefn